ბილი მილიგანის ნახევარი

– გაიღვიძე, ნოე! 

– ძვირფასო, ეს ვინაა? 

– არავინ, სამსახურიდან მირეკავენ. 

-გაიღვიძე,ნოე! 

ნოე თავზე საბანს იფარებს და ქრება. ლოგინის ქვეშ თეთრი ბაჭია ფშვინავს 

– გაიღვიძე, ნოე. 

– რა ხდება, რომელი საათია, გათენდა უკვე? 

– ჯერ არა, მაგრამ საქმე არ ითმენს. 

– ახლა რაღა მოხდა? 

– დღეს ვნახე და გრაფიკს ძალიან ჩამორჩები. 

– ვიცი, ვიცი, აი, ხვალ-ზეგ ჩავუჯდები და დავამთავრებ. 

– ერთი წელია, ასე მპირდები. 

– ვიცი, ხო, მაგრამ რა ვქნა, ათასი საქმეა. აქეთ ეს ბავშვები, ცოლი, სამსახური… 

– კაი, ხო, არ დაიწყო ახლა, წავედი მე. ზეგამდე, ხო? 

– კი, ზეგ წყალი არ გაუვა. 

– გაიღვიძე ნოე! 

– მღვიძავს. 

– თვალებს რატომ არ ახელ? 

– რა აზრი აქვს, სიბნელეში მაინც ვერაფერს დავინახავ. 

– ეგეც მართალია. რაღაც მინდა გითხრა. მისმენ? 

– სხვა რა გზა მაქვს. 

– გადაიდო. 

– კარგია, შეიძლება დავიძინო? 

– მიდი მიდი. ჩათვალე, უკვე წასული ვარ. 

– გაიღვიძე, ნოე!

– რატომ?

– იწყება. 

ნოე თავზე საბანს იფარებს და გარეთ გარბის.

– გაიღვიძე, ნოე!

– რომელი ხარ?

– გაიღვიძე, ნოე!

– მადლობა.

– რისთვის?

– მაღვიძარაზე კარგი ხმა გაქვს. 

– გაიღვიძე, ნოე!

– მღვიძავს.

– რატომ მერე, რა არ გაძინებს?

– ხალხზე ვფიქრობდი.

– სულ ტყუილად.

– კარგად მისმინე. არ იფიქრო, რომ რაიმეთი უკეთესი ხარ. ყველაფერი, რაც ხდება, შენი ბრალია და თუ ვინმეა დასასჯელი, სწორედ შენ. ასე რომ, ორ კაცს კიდევ წავიყვან და იმ პატარა გოგოსაც.

– ვერავისაც ვერ წაიყვან.

– მაგასაც ვნახავ.

– გაიღვიძე, ნოე!

– არ მეძინა, ვფიქრობდი.

– რაზე?

– რა საჭიროა ეს ყველაფერი?

– ვერ გავიგე.

– ხო, ვერც მე, მაგრამ აუცილებლად გავიგებ.

– გაიღვიძე, ნოე!

– და როდის მეძინა, რო? ან რა დამაძინებს. ფიცრები მომიტანეს და კაკლის ნაცვლად, ფიჭვია. ფიჭვი, გესმის? გეგონება, კუბოს ვაკეთებდე. რა დრო დადგა, ვერავის ვერ ენდობი კაცი.

– საკვების საქმე როგორაა?

– ბალახი უკვე მოვიტანეთ, ხორციც ადგილზეა, მაგრამ დროზე თუ არ დაიწყებ, გაგვიფუჭდება.

– კი, კი, შენ საქმეებს მორჩი და მე უკვე მზად ვარ.

– შენ დაიწყე და ნაწილს გზადაგზა გავაკეთებთ.

– გაიღვიძე, ნოე! ნოე… ნოე, სად ხარ?

– მოიცა, ახლავე მოვალ. რძეს გიცხელებ. როგორც ყოველთვის, ორი მარწყვით, ხო?

– კი, კი, რატომ წუხდები, ხუთი წუთით შემოგირბინე.

– კარგი რა, ეს რა შეწუხებაა.

– მაშინ მესამე მარწყვიც დაამატე.

გაიღვიძე, ნოე!

– შემეშვი, მეძინება!

No Comments Yet

Leave a Reply

Your email address will not be published.

You may use these HTML tags and attributes: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <s> <strike> <strong>