„ახაშენის ღვინის კურორტი და სპა“- გასტრონომიული თავგადასავალი იწყება

კახეთს ტურისტები არასდროს აკლდა, კულტურული მემკვიდრეობის უძველესი ძეგლები და რეგიონისთვის დამახასიათებელი არქიტექტურა ყოველთვის იქცევდნენ ვიზიტორების  ყურადღებას. თუმცა, ტურიზმის ახალი მიმდინარეობების ტრენდად ქცევის შემდეგ, საქართველოს ეს კუთხე კიდევ უფრო აქტუალური გახდა, რადგან ახლა საქართველოში ვიზიტორებისა და  ქვეყნის შიდა ტურისტების უმეტესობას ძირითადად გასტრო და ენო თავგადასავლები ხიბლავთ. სწორედ ამ ორ ტურისტულ მიმართულებას ეხამება იდეალურად „ახაშენის ღვინის კურორტი და სპა“.

ახაშენი, როგორც მიკროზონა, ქართული ღვინის ადგილწარმოშობის დასახელებათა ნუსხაშია და ამ ტერიტორიაზე მოყვანილი საფერავისგან დამზადებული ღვინო გამოირჩევა განსაკუთრებული გემოვნული თვისებებით. სასტუმროსა და სპას ნაგებობების გარშემო, 35 ჰექტარ  ტერიტორიაზე გადაშლილია ვენახი, სადაც დარგულია საფერავის ჯიშის ვაზი. აღნიშნული ღვინის კურორტის უნიკალურობის ერთ-ერთი მთავარი მიზეზიც სწორედ ეს არის. კომპლექსის სტუმრებს საშუალება აქვთ ადგილზე, ახაშენის მიკროზონაშივე გაეცნონ ქართული ღვინის დამზადების რვაათასწლიან ტრადიციებს.  ღვინის კურორტი ვენახების გარდა მოიცავს 41 სასტუმრო ნომერს, მათ შორის შშმ პირთათვის ადაპრიტებულ ნომრებს, ასევე, სპას, საცურაო აუზს, საბავშვო, საქმიან და გასართობ სივრცეებს. სასტუმროდან წელიწადის ოთხივე სეზონზე კავკასიონის ქედის თვალწარმტაცი ხედი იშლება, სულ მალე კი კურორტი ვიზიტორებს ღვინის (და არამარტო)  სპა პროცედურებსაც შესთავაზებს. 

საუცხოო გარემოსა და  უნიკალურ ღვინოსთან ერთად, აქ განვითარებულია ის მესამე კომპონენტიც, რომელიც ამ ადგილის სრულყოფილების ერთგვარი გარანტია – ეს გასტრონომიაა. მას შემდეგ, რაც სულ ცოტა ხნის წინ,   შეფ-მზარეულმა ირაკლი მიქაძემ რესტორნის სამზარეულო ხელოვნების დონეზე აიყვანა, „ახაშენის ღვინის კურორტი და სპა“ რეგიონში კულინარიული სტანდარტების მეტრია. 

ახალი მენიუსა და გემოების შესახებ მის ავტორს, შეფ-მზარეულ ირაკლი მიქაძეს ვესაუბრეთ, რომელიც ინტერვიუს დაწყებამდე გამოგვიტყდა, რომ მენიუზე მუშაობისას მისი მთავარი ინსპირაცია სწორედ  KTW ჯგუფის ღვინის ფართო ასორტიმენტი იყო. ამის დასტურიც ის არის, რომ მენიუში კერძების დიდი ნაწილის ინგრედიანტად სწორედ ეს ღვინოები გვხვდება. 

ხშირად ვსაუბრობთ თქვენი პროფესიის ადამიანებთან კერძებისა და ღვინის შეხამების შესახებ. ვეკითხებით, თუ რომელი კერძი – რომელ ღვინოს უხდება,  თუმცა ამ კუთხით თქვენი გადაწყვეტილება მეტად თამამი ჩანს. თქვენ ღვინისა და საკვების შეხამება ერთგვარ კულინარიულ ხრიკად გამოიყენეთ და ვხედავთ, რომ ღვინო თქვენს კერძებში ინგრედიენტად გვევლინება. 

ირაკლი მიქაძე: პირველ რიგში, უნდა აღინიშნოს, რომ ღვინისა და საკვების სინთეზი უმეტესწილად ჩვენი მენიუს უცხოური კერძების ნაწილში გამოვიყენეთ. ღვინო- როგორც ინგრედიენტი ევროპული კერძების ფართო ასორტიმენტში გვხვდება, თუმცა აქ მთავარი საიდუმლო ღვინის ქართული სახეობების შეხამებაშია. KTW ჯგუფის ღვინოების ფართო ასორტიმენტმა ამისი საშუალება და დიდი გასაქანი მოგვცა. დრესინგებში ქვევრის  ტანინიანი ღვინის გამოყენებამ გემოს ახალი თაიგულები შექმნა, განსაკუთრებით უნდა გამოვყო ფრანგული ხახვის წვნიანი, რომელსაც  „ველისციხის ვერანდის“ ქვევრის საფერავით ვამზადებთ. სიმბოლურია, რომ ეს ღვინო სწორედ საფრანგეთში, ქალაქ ბორდოში,  “La Cité du Vin” – მუზეუმიშია წარმოდგენილი და მისი გემოვნური თვისებები ფრანგების დიდი მოწონებით სარგებლობს.  ასევე, ჩვენი ერთგვარი ექსპერიმენტი იყო ბოსტნეულის სალათი როზეს ტიპის ღვინის სოუსით. ჩვენი მენიუ ერთგვარი მტკიცებულებაა იმის, რომ ღვინო მხოლოდ ხორციან კერძებთან არ არის იდეალურ სინთეზში. თუმცა ხორციან კერძებსაც შევუხამეთ ადგილობრივი ღვინის სახეობები. მათ შორის, ახაშენის მიკრო-ზონიდანაც. 

ახალ მენიუში ინგრედიენტად არა მხოლოდ ღვინო, არამედ ბრენდიც გვხვდება, მოგვიყევით ამ კერძის შესახებ – რა იყო მთავარი ინსპირაცია?

ირაკლი მიქაძე: ეს არის ორაგული სკანდინავიური რეცეპტით. ზოგადად, ეს ექსპერიმენტი არ არის და  აღიარებული ფაქტია კულინარიაში, რომ თევზის დამარინადებისთვის ბრენდი იდეალურია. თუმცა, ჩვენთან მთავარი საიდუმლო ბრენდის ხარისხშია.  მენიუზე მუშაობისას აღმოვაჩინეთ, რომ „ძველი კახეთის“ ბრენდი 17 წლიანი დაძველებით, დამარინადებისას ორაგულს განსაკუთრებულ გემოვნურ თვისებებსა და არომატების მრავალფეროვნებას სძენს. ამიტომ,  სკანდინავიური რეცეპტით მომზადებული, ბრენდში დამარინადებული ორაგული თაფლისა და მდოგვის სოუსით ჩვენი სამზარეულოს ერთ-ერთი გამორჩეული და განუყოფელი კერძი გახდა. 

კერძების დასახელებებშიც ჩანს, რომ აქტიურად იყენებთ ადგილობრივ აგრო-პროდუქციას, მკვეთრად არის გამოხატული კახური გასტრონომიის კომპონენტიც…

ირაკლი მიქაძე: დიახ, ჩვენი სამზარეულოს უნიკალურობა სწორედ იმაში მდგომარეობს, რომ ასეთი კერძების გასინჯვა მხოლოდ „ახაშენის ღვინის კურორტი და სპა“-ს რესტორანშია შესაძლებელი. ადგილობრივ, ჯანსაღ აგრო-პროდუქტს აქტიურად ვიყენებთ. მაგალითად,  მომხმარებელს ვთავაზობთ ბოსტნეულის კალათას პირდაპირ ფაფრის მინდვრიდან, ასევე, ალვანის გუდას, ინგრედიენტებად ვიყენებთ მზესუმზირის კახურ ზეთს, ახაშენის ყურძნის წიპწების ზეთს და სხვა. ალბათ უნდა გამოვყო, საერთაშორისო ვიზიტორების ერთ-ერთი საყვარელი კერძი ტოლმა ვაზის ფოთოლში, რომელსაც ახაშენის მიკროზონის საფერავის ფოთლებში ვახვევთ. ვფიქრობ, ადგილობრივი პროდუქციის გამოყენება აუცილებელია, რადგან ჩვენი კერძების დანიშნულება   სტუმრებისთვის გასტრონომიული თავგადასავლის შექმნაა, სწორედ ისეთის, რომელიც მათ გემოს რეცეპტორულ მახსოვრობაში ჩაიწერება და სამუდამოდ დაამახსოვრებს, რომ არომატების ეს შეხამება მხოლოდ ამ კონკრეტულ ადგილთან ასოცირდება.